ما تستغربش

طبعًا كلنا كنا متابعين المنتخب الوطنى فى بطولة كأس القارات ، وشفنا الهزيمة الكبيرة للمنتخب أمام العملاااااق - على الرغم إنه مش كدا خالص - الأمريكى ، وأنا قلت عملاق لأن  لما البرازيل تكسبنا بفارق هدف واحد بالعافية ، وكمان لما نغلب إيطاليا بطل العالم برضو بفرق هدف ، يبقى أكيد المنتخب اللى يغلب مصر فى الوقت دا بفارق 3 أهداف مقابل لا شىء فى مباراة واحدة يبقى أكيد " عملاق " .

وبعدين محدش يستغرب المستوى السىء اللى  شفنا المنتخب بيلعب بيه أمام أمريكا واللياقة التعبانة اللى شفناها وكمان التكتيك التعبان وكأنهم بيلعبوا مباراة شوارع  فى المباراة اللى خرجنا بيها من المنتخب  . . . . 

محدش يستغرب لما يشوف المنتخب المصرى بطل إفريقيا لعامىّ 2006 ، 2008 على التوازى . . . إحم . . أقصد ع التوالى 

لازم مانستغربش . . . بالعكس إحنا بكدا لازم نطمن إن منتخبنا بخير  . . . وإننا إن شاء الله وبإذن الله . . . عمرنا ما هنشوف إسم مصر فى كأس العالم .

أما الحاجة التانية اللى لازم أتكلم فيها :

هى قضية سرقة المنتخب بعد مباراة إيطاليا ، واتهام لاعبوا المنتخب إنهم اصطحبوا فتيات ليل فى غرفهم كما ذكرت الصحف فى جنوب إفريقيا

هنا لازم نذكر بعض بقول الله عز وجل " يا أيها الذين آمنوا إذا جاءكم فاسق بنبأ فتبينوا أن تصيبوا قومًا بجهالة فتصبحوا بما فعلتم نادمين " صدق الله العظيم 

لازم تكون نيتنا كويسة ناحية الناس دى - لاعبى المنتخب - ومحدش يردد أى كلام يتقال كدا وخلاص .

والإشاعات دى كانت طبعًا لمصلحة الجريدة اللى نشرته ومصلحة الدولة المنظمة لكأس العالم - جنوب إفريقيا - لأن دا بيهدد أمن وسلامة المنتخبات اللى هتكون موجودة أثناء البطولة .